Бишкек, 20.05.25 /Кабар/. "Чакан ГЭС" ААК күз-кыш мезгилине карата даярдык иштерин жүргүзүүдө. Бул тууралуу Энергетика министрлигинен билдиришти.
Маалыматка караганда, 19-майдан тарта 1957-жылдан бери тынымсыз иштеп келген "Чакан ГЭС" ААКтын №6 ГЭСинде №1 жана №2 гидроагрегат менен алардын көмөкчү системаларынын капиталдык ремонту башталды.
Азыркы учурда жабдууларды ремонтко чыгарууга даярдык иштери жүрүп жатат.
Капиталдык ремонттун алкагында төмөнкү жумуштар аткарылмакчы:
- гидроагрегатты демонтаждоо жана кайра монтаждоо;
- жетектөөчү аппаратты оңдоо;
- май кабылдагычты оңдоо;
- жабдууларды борборлоштуруу;
- статор менен роторду оңдоо;
- козгоо системасын калыбына келтирүү;
- тормоздоо системасын оңдоо;
- лак-боёк каптамаларын жаңылоо;
- гидроагрегатты кайра жыйноо жана орнотуу.
Оңдоо иштери жабдууларды штаттык абалга келтирип, алардын туруктуу жана коопсуз иштешин камсыз кылуу максатында жүргүзүлүүдө. Капиталдык ремонттун мөөнөтү — 60 күн, иштерди аяктоо жана №6 ГЭСти кайра ишке киргизүү июль айынын аягына пландалган.
Май айында №3 ГЭСте да учурдагы ремонт жана профилактикалык иштер аткарылды, анын ичинде:
- гидроагрегаттарда жана 35 кВ чубалгыларынын ячейкаларында электр өлчөөлөр;
- В6Г-1 жабдуусунун профилактикалык көзөмөлү;
- контакттарды тазалоо;
- электр өлчөөлөр жана сыноолор;
- майды лабораториялык талдоо үчүн үлгү алуу.
Капиталдык жана учурдагы ремонт иштери дарыялардагы суу деңгээли эң төмөн болгон учурда, суунун негизги бөлүгү сугат иштерине колдонулган мезгилге туура келгендей пландалган. Бул — гидроэлектростанцияларда ремонт жүргүзүү үчүн эң ылайыктуу учур. Ремонт иштери бекитилген графикке ылайык жүргүзүлүп, жогорку жүктөм мезгилинде жабдуулардын ишенимдүү жана үзгүлтүксүз иштешин камсыздоого багытталган.
