Бишкек, 20.05.25. /Кабар/. Өткөн жылга салыштырмалуу быйыл пенсия алуучулардын жалпы саны 28,5 миң адамга көбөйдү. Бул тууралуу маалымат кабминдин 4 айдагы иштин жыйынтыгын чыгарган кеңешмесинде айтылды.
Маалымдалгандай, 2025-жылдын 1-майына карата республика боюнча пенсия алуучулардын саны 807 миң 800 адамды түздү.
Белгиленгендей, 2025-жылдын январь-апрель айларында пенсияларды төлөөгө 34,4 млрд сом каражат багытталган. Бул өткөн жылдын ушул мезгилине салыштырмалуу пенсиялык төлөмдөрдү каржылоо 5,6 млрд сомго көбөйдү.
Ал эми үстүбүздөгү жылдын 1-майына карата мамлекеттик жөлөкпул алуучулардын жалпы саны 308,3 миң адамды түздү. Мамлекеттик жөлөкпулдарды төлөөгө бюджеттен жалпысынан 4,5 млрд сом бөлүндүгү кеңешмеде белгиленди.
Анын ичинен “үй-бүлөгө көмөк” жөлөкпулуна 1,1 млрд, социалдык жөлөкпулга 2,9 млрд, ал эми “балага сүйүнчү” жөлөкпулуна 179 млн сом каражат бөлүнгөн.
