Бишкек, 17.03.26. /Кабар/. Нарын облусу Нооруз-2026 элдик майрамына арналган негизги салтанаттардын борбору болот.
Президенттин аймактагы өкүлчүлүгүнөн "Кабар" агенттигине билдиришкендей, майрамдык иш-чара шаардын Т. Усубалиев атындагы борбордук аянтында өтөт.
Майрамдык программада:
- табияттын жаңыруусуна жана элдин биримдигине арналган театралдаштырылган оюн-зоок;
- салттуу сүмөлөк таркатуу жана улуттук оюндарды өткөрүү;
- күндүзгү масштабдуу концерт, ошондой эле саат 19:00дө өлкөнүн алдыңкы артисттеринин катышуусундагы гала-концерт.
Майрамдык салтанат саат 21:30да Нарындын түнкү асманын кооздогон жаркыраган фейерверк менен аяктайт.
Белгилей кетсек, 2025-жылы Нооруз майрамы президенттин катышуусунда Ош шаарында белгиленген.
