Бишкек, 29.09.26. /Кабар/. Борборрдук шайлоо комиссиясында президенттик шайлоого даярдык көрүү боюнча мамлекеттик органдардын өкүлдөрү менен жумушчу кеңешме өттү.
Боршайкомдон билдиришкендей, кеңешмени төрага Тынчтык Шайназаров өткөрдү. Ага Жогорку сот, Башкы прокуратура, Ички иштер министрлиги, Дин иштери жана этностор аралык мамилелер боюнча мамлекеттик агенттиктин, Мамлекеттик чек ара кызматынын жана башка мамлекеттик мекемелердин өкүлдөрү катышты.
Жыйында мамлекеттик органдардын өз ара аракеттенүүсү жана маалыматтарды ыкчам алмашуу маселелери каралды. Анын ичинде президенттикке талапкерлердин жарандыгы, соттуулугу, кылмыштуу же куралдуу топторго тиешеси жана диний ишмердикке катышуусу тууралуу маалыматтарды берүү маселелери талкууланды.
Ошондой эле талапкерлердин мамлекеттик тилди билүү деңгээлин тастыктаган сертификаттарын текшерүү, тестирлөөнү уюштуруу жана тиешелүү маалыматтарды өз убагында алмашуу маселелерине көңүл бурулду.
Тынчтык Шайназаров шайлоого даярдыктын бардык этаптарында мамлекеттик органдардын макулдашылган иш алып баруусу маанилүү экенин белгиледи.
