Бишкек, 01.07.26. /Кабар/. Брюссель шаарында Бүткүл дүйнөлүк бажы уюмунун кеңешинин сессиясы болуп өттү. Бул тууралуу Мамлекеттик бажы кызматынан билдиришти.
Маалыматка ылайык, жыйында аталган уюмга мүчө мамлекеттер 2025–2028-жылдарга карата Стратегиялык планды ишке ашыруу, бажы ишин санариптештирүү, жасалма интеллект жана маалыматтарды талдоо технологияларын колдонуу, тобокелдиктерди башкаруу системасын өркүндөтүү, электрондук сооданы өнүктүрүү, ошондой эле эл аралык соодага шарт түзүү менен катар эл аралык жеткирүү чынжырларынын коопсуздугун камсыз кылуу маселелерин талкуулашты.
Белгилей кетсек, Бүткүл дүйнөлүк бажы уюмуна дүйнөнүн 187 бажы администрациясы мүчө болуп саналат.
Кеңештин сессиясына катышуу кыргыз делегациясына бажы тармагындагы алдыңкы эл аралык тажрыйбалар менен таанышууга, чет өлкөлүк кесиптештер менен тажрыйба алмашууга, бажы кызматынын санариптик трансформациясын жана бажы администрлөөнүн натыйжалуулугун жогорулатууга багытталган реформаларды тааныштырууга мүмкүнчүлүк түздү.
