Бишкек, 22.04.25. /Кабар/. "Кыргызстандын көзү азиздер жана дүлөйлөр коому" коомдук бирикмеси көрүүсү жана угуусу боюнча майыптыгы бар адамдарды колдоо максатында концерт уюштурду.
Муниципалитеттен билдиришкендей, иш-чарага министрлер кабинетинин төрагасынын орун басары Эдил Байсалов, эмгек, социалдык камсыздоо жана миграция министри Равшанбек Сабиров, ошондой эле Бишкек шаарынын мэри Айбек Жунушалиев катышты.
Шаар башчысы өз сөзүндө Бишкек шаарында майыптыгы бар жарандар үчүн жеткиликтүү чөйрө этап-этабы менен ишке ашырылып жатканын баса белгиледи. "Акыркы бир ай ичинде коомдук жайларга заманбап талаптарга жооп берген 6 пандус орнотулду. Ошондой эле чыгармачыл демилгелер да колдоого алынууда", - деди ал.
Мындан тышкары, мэр Айбек Жунушалиев шаардык кызматтарга коомдун айланасын көрктөндүрүү иштерине көмөктөшүү тапшырмасын берди.
Иш-чара жогорку деңгээлде өтүп, концерт катышуучуларга көптөгөн жагымдуу эмоциялар менен эсте кала турган таасирлерди тартуулады.
