Бишкек, 20.08.26. /Кабар/. Бишкекте хирургия жана трансплантологиядагы инновациялык технологияларга арналган IX эл аралык илимий-практикалык конференция башталды.
Саламаттык сактоо министрлигинен билдиришкендей, иш-чара И.Ахунбаев атындагы Кыргыз мамлекеттик медициналык академиясында өтүүдө.
Конференцияга Кыргызстандын жана чет өлкөлөрдүн алдыңкы адистери катышып, заманбап хирургия жана трансплантологиядагы жетишкендиктерди талкуулоодо. Анда роботтоштурулган жана аз инвазивдүү операциялар, жасалма интеллект, хирургиялык навигация, онкологиялык хирургия жана жогорку технологиялык медициналык жардам маселелери каралууда.
Министр Дамирбек Осмонов заманбап технологиялар бара-бара клиникалык практиканын маанилүү бөлүгүнө айланып жатканын белгиледи. Анын айтымында, жаңы технологияларды өздөштүрүү менен катар аларды натыйжалуу колдоно алган медициналык адистерди даярдоого да өзгөчө көңүл буруу зарыл.
Конференциянын алкагында адистер татаал клиникалык учурларды талдап, тажрыйба алмашып, инновациялык ыкмаларды медициналык практикага киргизүү мүмкүнчүлүктөрүн талкуулашат.
Иш-чара 21-августта Ысык-Көл облусунун Кара-Ой айылында уланат.
