Бишкек, 03.04.26. /Кабар/. Бишкекте Шанхай кызматташтык уюмуна мүчө мамлекеттердин айлана-чөйрөнү коргоо боюнча жооптуу министрлик жана мекемелеринин жетекчилеринин жетинчи жыйыны жана эксперттик жолугушуусу башталды.
Иш-чаранын жүрүшүндө жаратылыш ресурстары, экология жана техникалык көзөмөл министри Акыл Токтобаев учурдагы экологиялык жана климаттык маселелер боюнча баяндама жасады.
Ал өз сөзүндө айлана-чөйрөнү коргоо маселелери учурда дүйнөлүк күн тартибинде негизги орунду ээлей турганын жана жаратылыш ресурстары, экосистемаларды сактабастан туруктуу экономикалык өнүгүү мүмкүн эместигин айтты.
Министр белгилегендей, ШКУ аймагы тоо кыркаларынан талааларга чейин ар түрдүү жаратылыш ландшафттары бар кеңири аймактарды камтыганын жана миллиондогон адамдардын жашоосун камсыз кылат. Ошол эле учурда экосистемалар климаттык жана антропогендик факторлордун таасирине туш болууда.
Аймактагы өлкөлөр үчүн негизги көйгөй бойдон калып келе жаткан климаттын өзгөрүшүнө өзгөчө көңүл бурулду. Кыргызстан тоолуу өлкө болгондуктан, анын кесепеттери өзгөчө олуттуу.
Акыл Токтобаевдин пикиринде, Кыргызстан ырааттуу экологиялык жана климаттык саясатты жүргүзүп, эл аралык процесстерге, анын ичинде БУУнун климаттын өзгөрүшү боюнча алкактык конвенциясынын алкагында активдүү катышууда.
“Парник газдарынын салыштырмалуу төмөн чыгарылышына карабастан, Кыргызстан 2050-жылга чейин көмүртектин нейтралдуулугуна жетүү максатын койгон. Бул максатта өлкө улуттук өнүктүрүү жана адаптация пландарын камтыган стратегиялык документтерди кабыл алып, Париж келишиминин алкагында ачык-айкындуулук механизмдерин ишке ашырууда”, - деди ал.
Ошол эле учурда министр кошумчалагандай, Кыргызстан үчүн, башка өнүгүп келе жаткан өлкөлөр сыяктуу эле, климаттык каржылоого, заманбап технологияларга жана потенциалды өнүктүрүүгө жетүү маселеси актуалдуу бойдон кала берет.
Ошондой эле Токтобаев тоо күн тартибин алдыга жылдырууга өзүнчө токтолду.
Президент Садыр Жапаровдун демилгеси менен БУУнун Башкы ассамблеясы 2023-2027-жылдарга карата “Туруктуу тоо өнүгүүсү” резолюциясын кабыл алды, ал тоолуу аймактарды өнүктүрүү үчүн беш жылдык мезгил деп жарыяланды.
Мындан тышкары, Кыргызстан эл аралык диалог үчүн аянтча катары кызмат кылууну улантууда. 2021-жылы Бишкекте 50дөн ашык өлкө катышкан тоолуу аймактарда туруктуу өнүгүү боюнча конференция өткөрүлдү.
Министр ошондой эле 2027-жылы экинчи Глобалдык тоо саммити “Бишкек+20” пландаштырылып жатканын айтып, ШКУга мүчө мамлекеттердин колдоосуна ишенимин билдирди.
Ошол эле учурда ал жолугушуунун катышуучуларын алдыдагы форумга активдүү катышууга жана тоолуу аймактарда туруктуу өнүгүү жаатындагы кызматташтыкты өнүктүрүүгө салым кошууга чакырды.
