Бишкек, 27.03.26. /Кабар/. Бүгүн Бишкекте мектеп окуучуларынын олимпиадасынын IV (республикалык) этабы башталды. Бул тууралуу Агартуу министрлигинен билдиришти.
Ачылыш аземине катышкан министрдин орун басары Надира Жусупбекова олимпиаданын башкы принциби татыктуулардын жеңиши экенин белгиледи.
"Сиздер бүгүн бул жерге келүү үчүн чоң эмгек жумшап, тынымсыз издендиңиздер. Ошондуктан ар бириңиздер буга чейин эле жеңүүчүсүздөр. Мыкты жыйынтыктарды көрсөтө турганыңарга ишенем. Ар бириңиздер өлкөбүздүн келечеги болуп, илим менен билимдин өнүгүшүнө салым кошо турган жаш муунсуздар. Баарыңарга ийгилик каалайм, чыныгы татыктуулар жеңсин", - деди ал.
Республикалык олимпиаданын бул этабына облустук жана шаардык турларда 1-2-орундарды ээлеген 330га жакын окуучу катышууда.
Олимпиада төмөнкү билим берүү уюмдарында өткөрүлүүдө:
- Чыңгыз Айтматов атындагы Бишкек лицейинде — математика, физика, тарых, информатика, география;
- Айчүрөк лицейинде — кыргыз тили, орус тили, англис тили;
- И.Арабаев атындагы Кыргыз мамлекеттик университетинде — химия жана биология.
Олимпиада эки күнгө созулуп, 30-мартта жеңүүчүлөрдү сыйлоо аземи өтөт.
