Бишкек, 19.05.25. /Кабар/. Бүгүн агартуу министринин орун басары Лира Самыкбаева Улуу Британиянын Тышкы иштер министрлигинин Чыгыш өнөктөштүгү жана Борбор Азия боюнча директорунун орун басары Марк Клейтон менен жолугушту.
Ведомстводон маалымдашкандай, конокту Улуу Британиянын Кыргыздагы элчиси Николас Боулер коштоп жүрдү.
Жолугушуунун жүрүшүндө тараптар билим берүү тармагындагы эки тараптуу кызматташтыктын актуалдуу маселелерин, биргелешкен программалардын ишке ашырылышын, ошондой эле Кыргызстандын Агартуу министрлиги жүргүзүп жаткан реформалардын негизги багыттарын талкуулашты.
Жолугушууда педагогдордун кесиптик өнүгүүсүнө, билим берүү мазмунун жаңылоого жана эки тараптуу кызматташтыктын алкагында жаңы демилгелерди ишке ашыруу мүмкүнчүлүктөрүнө өзгөчө көңүл бурулду.
Жолугушуу ачык жана конструктивдүү баарлашуу маанайында өтүп, тараптар Кыргызстан менен Улуу Британиянын билим берүү тармагындагы кызматташтыкты мындан ары да бекемдөөгө жана кеңейтүүгө өз ара кызыкдар экенин белгилешти.
