Бишкек, 20.04.26. /Кабар/. Бишкекте “Жаңы ысымдар” XI эл аралык студенттик театр фестивалы аяктады. Бул тууралуу Маданият, маалымат, спорт жана жаштар саясаты министрлигинен билдиришти.
Маалыматка ылайык, СССРдин эл артисти Бүбүсара Бейшеналиеванын 100 жылдыгына арналган фестивалга Кыргызстан, Россия, Түркия, Өзбекстан, Казакстан жана Азербайжандын искусство окуу жайларынын студенттери катышты.
Башкы байгени Б. Бейшеналиева атындагы Кыргыз мамлекеттик маданият жана искусство университетинин (КМУИУ) театр факультетинин 3-курсунун студенттери “Каткелди” спектакли менен утуп алышты.
Байгелүү орундар төмөнкүдөй бөлүштүрүлдү:
- 1-орун: КМУИУнун 5-курсунун студенттери (“Кашаба” спектакли) жана Т. Жургенов атындагы Казак улуттук өнөр академиясынын студенттери (“Гамильтон” спектакли);
- 2-орун: Өзбекстан мамлекеттик искусство жана маданият институту (“Тагдыр эшиги” спектакли) жана Россиянын театралдык окуу жайынын студенттери (“Атылган ок” спектакли);
- 3-орун: КМУИУнун 2-курсунун студенттери (“Таштабачы, апаке” спектакли) жана Азербайжан мамлекеттик маданият жана искусство университетинин студенттери (“Винета же чөгүп кеткен шаар” спектакли).
Ошондой эле фестивалдын алкагында “Мыкты ансамбль”, “Мыкты эксперимент”, “Эркектин жана аялдын ролун мыкты аткаргандыгы үчүн” сыяктуу бир катар номинациялар боюнча сыйлыктар тапшырылды. Мындан тышкары, көркөм окуу, драматургия жана театр сыны багыттары боюнча да жеңүүчүлөр аныкталды.
Белгиленгендей, аталган эл аралык фестиваль 11 жылдан бери салттуу түрдө өткөрүлүп келет.
