Бишкек, 18.09.26. /Кабар/. Баткен облусунун Раззаков жана Сүлүктү шаарларында эл аралык "Өрүкзар" фестивалы башталды. Бул тууралуу өкүлчүлүктөн билдиришти.
Маалыматка ылайык, 18–20-сентябрда – үч күнгө созула турган маданий-туристтик иш-чара Раззаков шаарында мамлекеттик жана саясий ишмер Исхак Раззаковдун эстелигине гүл коюу аземи менен башталып, маданий программа тартууланды.
Иш-чаранын жүрүшүндө Лейлек районундагы Курбаналы Сабыров атындагы орто мектебинин окуучулары К. Сабыровдун калемине таандык ырларды бир нече тилде аткарып, көрүүчүлөргө тартуулашты.
Салтка айланган фестивалга Кыргызстан, Тажикстан, Өзбекстан, Казакстан жана Россия мамлекеттеринен акын-жазуучулар, адабият сүйүүчүлөрү келишти.
Фестиваль алдыда "Сүлүктү–Белес Резорт" эс алуу борборунда уланат. Анда жаш акындардын сынагы өткөрүлүп, жеңүүчүлөр аныкталат. Ошондой эле белгилүү калемгерлер, коомдук ишмерлер жана поэзия сүйүүчүлөрүнүн катышуусунда ыр кечелери уюштурулат.
"Өрүкзар поэзия күнү" — Баткен облусунун Раззаков шаарында жыл сайын өткөрүлүүчү салттуу эл аралык поэзия фестивалы. Иш-чара Лейлек жергесинен чыккан белгилүү акын Курбаналы Сабыровдун жаркын элесине арналып, жаш акындарды колдоо жана поэзия өнөрүн жайылтуу максатын көздөйт. Быйыл иш-чара 36-жолу өткөрүлүүдө.
