Бишкек, 11.11.26. /Кабар/. Бүгүн Бишкектеги “Ала-Арча” мамлекеттик резиденциясында “Борбор Азия – Кытай” курулуш министрлеринин экинчи конференциясы өтүүдө. Бул тууралуу Курулуш министрлиги билдирет.
Иш-чарага Кыргызстандын курулуш, архитектура жана турак жай-коммуналдык чарба министри Нурдан Орунтаев, "Борбор Азия – Кытай" форматынын катчылыгынын башкы катчысы Сунь Вэйдун, Кытайдын турак жай, шаардык жана айыл-чарба курулуш министри Ни Хун, Казакстан өнөр жай жана курулуш министри Ерсайын Нагаспаев, Тажикстандын Архитектура жана курулуш комитетинин төрагасы Низом Юсуфи Мирзозода, Түркмөнстандын курулуш жана архитектура министри Абдулла Гелдиев жана Өзбекстандын курулуш жана турак жай-коммуналдык чарба министри Шерзод Хидоятов катышууда.
Конференцияда курулуш тармагындагы бир катар стратегиялык маселелер каралууда. Алардын катарында жер титирөөгө туруктуу имараттарды куруу, сапаттуу жана жеткиликтүү турак жай менен камсыздоо, курулуш материалдарын өндүрүү, инвестиция тартуу, санариптик технологияларды киргизүү жана адистерди даярдоо бар.
Жыйындын алкагында буга чейинки келишимдердин аткарылышы талданып, 2027–2028-жылдарга карата биргелешкен иш-аракеттер планын кабыл алуу жана тараптардын сунушу талкууланат.
Эске салсак, “Борбор Азия – Кытай” курулуш министрлеринин биринчи конференциясы 2025-жылы Пекин шаарында өткөн. Анын жыйынтыгында курулуш тармагындагы ар тараптуу кызматташтыктын негизги багыттарын аныктаган Пекин демилгеси кабыл алынып, экинчи конференцияны өткөрүү Кыргызстанга тапшырылган.
