Бишкек, 08.07.26. /Кабар/. Эки жүк ташуучу унааны баштапкы каттоодон мыйзамсыз өткөрүү фактысы аныкталды. Бул тууралуу Мамлекеттик бажы кызматынан билдиришти.
Текшерүүнүн жүрүшүндө 2012-жылы чыгарылган эки DAF үлгүсүндөгү жүк ташуучу унаа Россиядан сатып алынган деген документтер менен катталган. Бирок Россиянын компетенттүү органдары бул унаалар бажылык тариздөөдөн өтпөгөнүн, ошондой эле аталган өлкөдө эч качан каттоого алынбаганын тастыкташкан.
"Эки транспорт каражаты боюнча төлөнбөй калган бажы төлөмдөрүнүн жалпы суммасы 3 млн 109 932 сомду түзгөн. Көрүлгөн ыкчам чаралардын натыйжасында мамлекетке келтирилген 3,1 млн сомдон ашык материалдык зыяндын орду толугу менен толтурулду. Учурда топтолгон материалдар мыйзамга ылайык процессуалдык чечим кабыл алуу үчүн Бажы кызматынын Тергөө башкармалыгына өткөрүлүп берилди",-деп айтылат маалыматта.
