Бишкек, 02.04.25. /Кабар/. Баткенде миграциядан кайткан 23 жаран ишкердик үчүн грант алууда. Бул тууралуу президенттин Баткен облусундагы өкүлчүлүгү билдирди.
Каражат Эл аралык миграция уюумунун “Борбор Азиядан Улуу Британияга сезондук жумушчулар үчүн коопсуз миграция” долбоорунун алкагында "1+1" программасы менен берилүүдө.
Аталган долбоордун алкагында, чет мамлекеттерде миграцияда жүрүп, мекенине кайткан жарандарды, туруктуу жумуш орду менен камсыздап, мекенинде киреше табуу менен аймактын социалдык экономикалык өнүгүүсүнө салым кошуу аракеттери колдоого алынган.
Долбоордон грант алган жарандар учурда бал өндүрүү, кондитердик азыктарды даярдоо, кофейня ачуу, тигүү цехин ачуу, мончо ачуу, курулуш шаймандарын ижарага берүү, күнөскана иштетүү, үй эмеректерин жасоо, унаа жуучу жай ачуу, дүкөн ачуу сыяктуу чакан ишкердикти баштоодо.
Бул багытта аткарылып жаткан иштерди байкоо, демилгелерди өнүктүрүү максатында Бишкек шаарында атайын жыйын өтүп, ага Баткенден президенттин Баткен облусундагы өкүлүнүн аппаратынын регионду өнүктүрүү бөлүмүнүн башчысы Батма Имаралиева менен долбоордун жеңүүчүлөрү катышты.
Жыйында долбоор жетекчилери менен долбоордун жеңүүчүлөрү алгач ирет Баткенде ишке ашырылган долбоордун артыкчылыктуу багыттарын талкуулашты.
Белгилей кетсек, Баткен облусу Кыргызстанда миграция күч аймак болуп саналат. Учурда облустун 37 миңдей тургуну ички жан сырткы миграцияда жүрөт.
Мындан улам Эл аралык миграция уюмунун колдоосу менен Баткенде Молдова мамлекетинин мигранттарды мекенине кайтаруу боюнча тажрыйбасы ишке ашырылууда.
Бул багытта президентитин Баткен облусундагы өкүлүнүн аппаратынын үч кызматкери Молдова мамлекетинде тажрыйба алмашып келди. Алдыда бул багытта Эл аралык миграция уюму тарабынан мүмкүнчүлүктөрдү кеңейтүү, дагы башка долбоорлорду колдоо боюнча иш-аракеттер жүрүп жатат.
