Бишкек, 02.06.26. /Кабар/. Бишкек шаарынын мэриясы 1-июнь – Балдарды коргоо күнүнө карата Ала-Тоо аянтында өткөн майрамдык иш-чарадагы кемчиликтер үчүн жооптуу кызматкерлерди жазалады. Бул тууралуу муниципалитеттен билдиришти.
Иш-чара учурунда майрамдын форматына жана тематикасына ылайыксыз музыкалык чыгармалардын жаңырганы боюнча кызматтык иликтөө жүргүзүлдү.
Иликтөөнүн жыйынтыгы боюнча көрүлгөн тартиптик чаралар:
- Виктория Мозгачева (мэрдин орун басары) — катуу сөгүш берилди;
- Назгүл Мекешова (Маданият башкармалыгынын башчысы) — сөгүш жарыяланды;
- Урмат Белекбаев (Маданият башкармалыгынын башчысынын орун басары) — ээлеген кызматынан бошотулду.
Мындан тышкары, аянтта диджей (DJ) катары өнөр көрсөткөн Дельфий оюндарынын катышуучусу буга чейин алган бардык сыйлыктарынан ажыратылды. Ага карата мыйзам чегинде кошумча чаралар көрүлөт. Ошондой эле бул музыкалык топтомду даярдоого жооптуу болгон педагогду ээлеген кызматынан бошотуу тапшырмасы берилди.
"Мэрия бул катачылыкка жол берген калган аткаруучулар жана кызмат адамдары да аныкталып, тартиптик жоопкерчиликке тартыларын кошумчалады",-деп айтылат маалыматта.
