Бишкек, 16.05.25. /Кабар/. Министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жайы министри Бакыт Төрөбаев Жумгалдын Чаек айылындагы темир-бетон курулуш материалдарын чыгаруучу заводдун ишмердүүлүгү менен таанышты. Бул тууралуу ведомстводон маалымдашты.
“Жумгалсуукурулуш” ААК 1995-жылы түзүлгөн. Учурда курулуш жана айыл чарба тармагында туруктуу иш жүргүзүп келет. 2023-жылдын июль айынан бери компания темир-бетон шакекчелерин чыгаруучу заводду иштетип жатат.
Заводдо 60 жумуш орду түзүлүп, саатына 30 метр куб темир-бетон буюмдары чыгарылат. Долбоордун жалпы наркы 200 миң долларды түзөт.
Азыркы кезде ишкана райондун аймагында жүрүп жаткан таза суу жана ирригация долбоорлору үчүн темир-бетон шакекчелерди жана лотокторду чыгарып, курулуш иштеринин үзгүлтүксүз жүрүшүнө салым кошууда.
Таанышуунун соңунда курулуп жаткан объектилерди ирригация тармагына керектелүүчү буюмдар менен толук камсыз кылуу боюнча бир катар макулдашууларга жетишилди.
