Бишкек, 25.11.25. /Кабар/. Күн мурун министрлер кабинетинин төрагасынын орун басары — айыл чарба, суу ресурстары жана кайра иштетүү өнөр жайы министри Бакыт Төрөбаев Ысык-Көл облусунун Түп районундагы “Түп” картошка өстүрүүнү өнүктүрүү борборуна барды.
Ведомстводон билдиришкендей, сапардын жүрүшүндө министр борбордун ишмердүүлүгү жана картошка сактоо инфраструктурасы менен таанышты.
Борбордун башкы багыты — сапаттуу үрөндүк материалдарды өндүрүү жана заманбап технологияларды колдонуу менен дыйкандарды жаңы, жогорку сапаттагы үрөн менен камсыз кылуу.
Учурда уруктук картошка атайын 2–3 градус температурадагы муздаткыч кампаларда сакталууда, бул алардын сапатын узак мөөнөткө сактоого мүмкүндүк берет.
Бакыт Төрөбаев борбордун техникалык базасын, үрөн өндүрүүдө колдонулуп жаткан жабдууларды жана технологиялык мүмкүнчүлүктөрдү дыкат көрүп чыкты.
Борбордун өкүлдөрү министрге үрөн чарбасын түзүүгө көмөктөшүү өтүнүчүн айтып, келечектеги пландары менен бөлүштү.
Алардын негизги максаты:
- Жаңы сортторду чыгаруу жана лаборатория куруу.
- In vitro технологиясы аркылуу картошка өндүрүүнү жолго коюу.
- Кыргызстандын дыйкан-фермерлерин сапаттуу үрөн менен камсыз кылуу.
Бакыт Төрөбаев бул демилгелерди жогору баалап, алар өлкөнүн үрөн чарбасын өнүктүрүүдө, импортко болгон көз карандылыкты азайтууда жана айыл чарба өндүрүшүнүн туруктуу өсүшүн камсыздоодо маанилүү кадам болорун баса белгиледи.
Сапаттуу үрөндүк материалды жергиликтүү деңгээлде өндүрүү картошканын түшүмдүүлүгүн жогорулатууга, дыйкандардын чыгымын азайтууга жана жалпы рыноктогу продукциянын сапатын жакшыртууга чоң өбөлгө түзөт.
