Ысык-Көлдүн түштүк жээги ачык асман алдындагы аренага айланды. “Салбуурун” этнофестивалы дүйнө жүзүндөгү туристтерди кыргыз элинин маданияты менен жакындан таанышууга, байыркы көчмөндөрдүн салттуу аңчылык жана этно-оюндарына суктанууга мүмкүнчүлүк түздү.
Бөкөнбаев айылындагы аянтчада фестивалдын конокторуна мергенчилик, канаттуулар (бүркүттөр), тайгандар жана кыргыз жылкы породалары көрсөтүлдү. Ошондой эле “Кыргыз күрөш”, “Кыз куумай”, “Тайган жарыш” сыяктуу жана башка улуттук оюндар көрсөтүлдү. Айрыкча кызыктуу шоу болуп, бүркүтчүлөрдүн бүркүттөр жана тайгандар менен аң уулоосу, жаа атуу боюнча мелдеши жана ат үстүндө оюн көрсөтүүсү болду.
Иш-чаранын уюштуруучуларынын бири, “Travel Experts” туристтик компаниясынын жетекчиси Сергей Глуховеров бул фестиваль эмне экенин жана кандай максаттарды көздөрүн айтып берди.
““Салбуурун” – аңчылыктын байыркы өнөрү, ал өзүнө үч элементти камтыйт: жырткыч канаттуулар – шумкар жана бүркүт менен аңчылык кылуу, тайгандар менен аңчылык кылуу жана жаа атуу. Салбуурун федерациясы көп жылдардан бери бар, бирок алар тар чөйрөдө мелдештерди өткөрүп келишет. Ал эми биз, туроператорлор, алардын туризм дүйнөсүндө атактуу болушуна жардам берүүнү чечтик. Бул фестиваль тууралуу чет элдик туроператорлорго айтып, Кыргызстан дүйнөгө тоолору, боз үйлөрү гана эмес, салт-санаасын сактаган кызыктуу, кайталангыс адамдары бар өлкө катары таанылышы үчүн аны жайылтуу милдетин алганбыз. Биз бул фестивалды жыл сайын өткөрүп турууну каалап жатабыз. Ар жылдын август айынын биринчи ишембисинде өткөрүлүп турса деген тилегибиз бар. Ошондо дүйнө жүзүндөгү туристтер бул фестиваль сөзсүз өтөрүн билип, ага бир нече жыл мурда эле билет алып, алдын ала даярданып калышат”,-деди ал.
Туроператор иш-чаранын максаты кыргыз элинин тарыхын, маданиятын, үрп-адатын сактап калуу экенин кошумчалады.
“Биз азыр жаштар көбүнчө гаджеттерге кызыгып, бильярд, гольф, боулинг сыяктуу оюндарды ойнобой жаткандарын көрүп жатабыз. Ал эми салбуурунчулар жаштарды улуттук оюндарга жана аңчылыкка үйрөтүп, кыргыз элинин салт-санаасын, маданиятын сактап жатышат”, – деди ал.
Сергей Глуховеров эгерде жалпыга маалымдоо каражаттары Кыргызстандагы мындай маданий иш-чаралары тууралуу дүйнөгө кеңири маалымат таратса, анда өлкөгө жылдын бардык мезгилинде туристтер келе баштайт деп белгиледи. Алар ар бир аймакта салбуурунчулардын үйүнө мейман катары баш багып турушат. Бул болсо салбуурунчулардын өз өнөрүн таштап, чет өлкөгө иш издеп кетпей, өз мекенинде, үй-бүлөсүнүн жанында калып, хоббиси аркылуу киреше табуусуна шарт түзөт. Ошол эле учурда бул алардын элинин салттарын сактап калуусуна да көмөкчү болот.
Өз кезегинде Салбуурун фестивалынын негиздөөчүсү жана уюштуруучусу Алмазбек Акунов бул фестивалдын келечеги бар экенин белгиледи.
“Бул иш-чараны өткөрүү менен биз кыргыз элинин маданий мурасын жана аталарыбыз, чоң аталарыбыз эмне менен алектенгенин көрсөткүбүз келет. Биз жаштарды каада-салттын духунда тарбиялап келебиз. Анын аркасында жылдан жылга салбуурунчулардын саны көбөйүп жатканы кубандырат”, - деди ал.
Алмазбек Акунов учурда фестивалды өз алдынча жана тартылган демөөрчүлөрдүн жардамы менен өткөрүп жатканын кошумчалады.
