Бишкек, 12.04.26. /Кабар/. Агартуу министри Догдуркүл Кендирбаева 11-апрелде Австрияда эмгектенип жүргөн кыргызстандык мекендештер менен жолугушту. Бул тууралуу аталган министрликтен билдиришти.
Ведомствонун маалыматына ылайык, анда министр мекендештердин балдарын кыргыз тилинде окутуу боюнча сунуш-пикирлерин угуп, бул багытта кызматташууну күчөтүүнү сүйлөштү.
Ошондой эле министр өзү ала барган чүкөлөрдү белек кылды.
Андан соң IT тармагында эмгектенген 2024-жылы “Эл үмүтү” президенттик стипендиясынын ээси, Вена техникалык университетинин докторанты, кванттык информатика тармагында изилдөө жүргүзүп жаткан Мээржан Канатбекова жана Австриядагы диаспоранын жетекчиси, ошондой эле HDI камсыздандыруу компаниясында программист болуп иштеген Мээрим Аттокур менен жолугушту.
Министр Кыргызстандагы жогорку окуу жайларда жана онлайн мектептерде онлайн жана офлайн форматта сабак өтүү мүмкүнчүлүгүн сунуштады.
Сүйлөшүүнүн жүрүшүндө мекендештер Кыргызстандагы окуучулар үчүн онлайн сабактарды өтүүгө жана билим берүү системасына өз салымын кошууга даяр экендиктерин билдиришти.
Жыйынтыгында бир катар иштерди биргелешип ишке ашыруу боюнча макулдашууларга жетишилди.
