Бишкек, 09.05.26. /Кабар/. Ат-Башы районунда Улуу Ата Мекендик согуштагы Жеңиштин 81 жылдыгына арналган эскерүү иш-чарасы өткөрүлдү. Бул тууралуу облустагы өкүлчүлүктөн билдиришти.
Маалымдалгандай, митинг-реквиемде согушта курман болгон жоокерлер эскерилип, эстеликке гүлчамбарлар коюлуп, куран окулду.
Президент Садыр Жапаровдун атынан облустагы согуштун ардагери Сатынды Жапаровго терең ыраазычылык билдирүү менен 200 миң сом өлчөмүндөгү бир жолку материалдык жардамы тапшырылды.
Майрамдык митинг-реквиемге облус башчысы, район жетекчилери, согуштун ардагери Сатынды Жапаров, мекеме-ишканалардын өкүлдөрү жана район тургундары катышты.
Белгилей кетсек, Нарын облусундагы жалгыз ардагер Сатынды Жапаров учурда Ат-Башы районунда жашайт. Ал 1926-жылы Ат-Башы районунун Ак-Муз айылында төрөлгөн. 1944-жылы Советтик Армиянын катарына чакырылып, Улуу Ата Мекендик согуш мезгилинде Ленинград багытындагы аскердик операцияларга катышкан. Согуштан кийин эмгек жолун улантып, узак жылдар бою Ат-Башы районундагы сүт кабыл алуу тармагында эмгектенген.
Бүгүнкү күндө Нарын облусунда согуштун бир жана ооруктун 7 ардагери жашайт.
Сүрөт: УТРК Нарын
