Бишкек, 07.10.25. /Кабар/. Ишеналы Арабаев атындагы Кыргыз мамлекеттик университетинде окуу жайдын 80 жылдык мааракесине карата моделдик китепкананын салтанаттуу ачылышы болду.
Окуу жайдан билдиришкендей, иш-чарага КМУнун ректору Айгүл Абдраева, окуу иштери боюнча проректору Дурус Козуев, илим жана инновациялар боюнча проректору Айгүл Чалданбаева, профессордук-окутуучулук курамы жана студенттер катышты.
Модель китепкана заманбап санариптик технологияларды камтыйт. Студенттик кызматтар автоматташтырылган жана атайын сканер эки сааттын ичинде 10 000 китепти сканерлей алат.
Мындан тышкары, университет Россиянын, Өзбекстандын жана Казакстандын алдыңкы университеттери менен кызматташууну активдүү өнүктүрүүдө, профессордук-окутуучулук курамынын жана илимий кызматкерлердин илимий жарыялоо ишмердүүлүгүн жогорулатууда.
Моделдик китепкана россиялык «Библио-Про» компаниясы менен биргелешкен долбоордун алкагында түзүлүп, заманбап технологиялар менен жабдылган. Анда ыңгайлуу окуу, илимий изилдөөлөрдү жүргүзүү, инновациялык долбоорлорду ишке ашыруу үчүн бардык шарттар түзүлгөн.
