Бишкек, 26.05.25. /Кабар/. Бүгүн, 26-майда Баткен облусунун аймагындагы мектептерде 2024-2025-окуу жылын жыйынтыктаган акыркы коңгуроо кагылып, жер-жерлерде салтанаттуу иш-чаралар өтүүдө.
Президенттин Баткен облусундагы өкүлчүлүгүнөн билдиришкендей, облустагы мектептерде 9-классты 10459 окуучу,11-классты 5322 окуучу бүтүрүүдө. Ал эми 1-класска жыл башында 12690 окуучу кабыл алынган.
Бул күнү Баткен шаарындагы Жоомарт Бөкөнбаев атындагы орто мектептеги салтанатка Баткен облусунун башчысынын кеңешчиси Айжигит Акматов катышып, бүтүрүүчүлөргө облус башчысынын куттуктоосун жеткирип, алдыңкы окуучуларды тарбиялаган мугалимдерге сыйлыктарды тапшырды.
"Акыркы коңгуроо" иш-чарасын өткөрүүдө, президенттин Баткен облусундагы ыйгарым укуктуу өкүлү Айбек Шаменовдун буйругуна ылайык, коопсуздук чараларын камсыз кылуу боюнча бардык тийиштүү мамлекеттик органдар өз багыты боюнча иш алып барууда.
Белгилей кетсек, учурда облуста беш типтүү мектептин курулушу жана төрт мектептин капиталдык оңдоп түзөө иштери жүрүүдө. Бул билим берүү мекемелери жыл соңуна пайдаланууга берилет.
