Бишкек, 12.11.25. /Кабар/. Көптөгөн америкалык компаниялар импорттук товарларга салынган бажы тарифтеринен улам «кара жумага» карата салттуу арзандатууларды өткөрүүдөн баш тартышты. Бул тууралуу Bloomberg агенттиги кабарлайт.
Басылманын маалыматына ылайык, Coach (люкс сумкалардын өндүрүүчүсү) жана Therabody (ден-соолукту чыңдоочу жабдууларды чыгаруучу белгилүү компания) сыяктуу бренддер промоакциялардан баш тарткан, бирок компаниялардын себептери ар башка. Негизги себептер — чыгымдардын көбөйүшү жана инфляция.
Upstream Brands компаниясынын башчысы Дэн Пескорс өз фирмасы арзандатууларды сунуштоого негиз жок деп эсептээрин белгиледи, себеби бажы тарифтери киргизилгенден кийин чийки заттын жана компоненттердин баасы кескин көтөрүлгөн.
AlixPartners консалтинг компаниясынын өкүлү Соня Лапински америкалык чакан жана ири соода тармагы жалпыга таандык олуттуу кыйынчылыктарга туш болуп жатканын белгиледи.
Анын айтымында, импорттук бажы тарифтери киргизилгенден кийин компаниялар үчүн арзандатууларды сунуштап, чыгымсыз иш алып баруу мүмкүнчүлүгү дээрлик калган жок.
Адистер белгилешкендей, «кара жумадагы» салттуу арзандатуулардан баш тартуу сезондук сатуу көлөмүнө таасир этиши мүмкүн жана америкалыктардын сатып алуу адаттарын өзгөртүшү ыктымал.
