Бишкек, 20.02. 26. /Кабар/. Бүгүн агартуу министри Догдуркүл Кендирбаева Республикалык илимий-методикалык борбордун ишмердүүлүгү менен таанышты.
Ведомстводон маалымдашкандай, алгач борбордун окуу жана иш бөлмөлөрүн, китепканасын, ошондой эле жатаканасынын шарттарын көрүп чыкты.
Андан соң министр борбордун эмгек жамааты жолугушууда бүгүнкү күндө дүйнө жүзүндө жумушчу кесиптерге суроо-талап жогору экенин белгилеп, жумушсуздукту азайтууда кесиптик лицейлердин орду өзгөчө мааниге ээ экенин айтты.
"Ар бир өзгөрүү — бул күрөш. Биз кесипке багытталган билим берүүгө өттүк. Бүгүнкү күндө дүйнө жүзүндө жумушчу кесиптер биринчи орунда турат. Ошондуктан билим берүү системасы эмгек рыногунун талаптарына шайкеш келиши зарыл.
Биздин негизги максатыбыз — атаандаштыкка жөндөмдүү, заманбап технологияларды өздөштүргөн, өз кесибин мыкты билген адистерди даярдоо. Бул багытта окуу программаларын жаңылоо, материалдык-техникалык базаны чыңдоо жана педагогдордун квалификациясын жогорулатуу иштерин күчөтөбүз", — деди министр.
Министр кесиптик лицейлерди санариптештирүү үчүн "Санарип кампа" жана "АИС мугалим" базаларын түзүү тапшырмасын берди. Борбордун директору А. Карабаев билдиргендей, мекеме окуу мазмунун методикалык жактан камсыз кылып, адистердин квалификациясын жогорулатууда. Маалыматка ылайык, 2025-жылы 900дөн ашык мугалим кайра даярдоо курстарынан өткөн.
