Бишкек, 21.03.25. /Кабар/. Министрлер кабинетинин төрагасы Адылбек Касымалиев Чүй облусунда болгон жумуш сапарынын алкагында бир катар ишканалар менен таанышты.
Алсак, минкаб башчысы Жайыл районундагы «Стандарт фарм групп» ЖЧКсы куруп жаткан фармацевтикалык өнөр жай объектисине барды. Маалым болгондой инвестициянын жалпы көлөмү 41 миллион 200 миң доллары түзүп, өндүрүштүн пландаштырылган жылдык көлөмү эки фазадагы иштер бүткөрүлгөн соң 60 млн долларга чейин жетет. Бул ишкана дары дармектин көп түрүн өндүрүп, жылына 1 млрд. даана – таблеткалар; 1 млрд. даана – желатин капсулалары; 100 млн. бөтөлкө (ар кандай көлөмдө) – бактерияга жана сезгенүүгө каршы физиологиялык эритмелерди (инъекция үчүн) өндүрмөкчү. Жалпысынан эки фазаны бүткөргөндөн кийин 300 жаңы жумуш оруну түзүлөт.
Андан соң Касымалиев Москва районунун Нарзан айыл аймагында жайгашкан «Кыргызцентрпродукт» ЖЧКсынын ишканасын көрүп чыкты. Бул ишкана кургатуу жана дароо тоңдуруу цехтери аркылуу жашылчаларды (сабиз, картошка, капуста, пияз, кызылча жана тоют ж.б) сактоо, калибрлөө, жана таңгактоо менен шугулданат.
Ошондой эле минкаб башчысы Адылбек Касымалиев “Сан Планет Интернэшнл” ЖЧКсы тарабынан курулуп жаткан жергиликтүү өндүрүштөгү мөмө-жемиш жана жашылча азыктарын кайра иштетүүчү ишкана менен таанышты. “Сан Планет Интернешнл” - компания сертификацияланган органикалык продукцияны өндүрүп, Европа биримдигинин өлкөлөрүнө, Россия Федерациясына, Кытайга жана АКШга экспорттойт. Өздүк инвестициялардын жалпы болжолдуу көлөмү кеминде 23 млн 400 миң долларын түзүп, ага 2500 м2 өндүрүштүк жайлары, 3000 м2 кампа жайлары жана1000 м2 административдик жана көмөкчү жайларды куруу иштери жүрүүдө. Өндүрүштү ишке киргизүүдө жергиликтүү тургундарды 250 жаңы жумуш орун менен камсыздоо болжолдонууда, чийки затты сатып алуу райондун 2000ден ашуун фермери тарабынан ишке ашырылаары күтүлүп жатат.
Андан ары ал “Глассленд Компани” ЖЧКсынын стеклопакет жабдуулардын чогултуу жана терезе өндүрүү ишканасынын ишмердүүлүгүнөн кабар алды. Ишканада учурда куруу жана жабдыктарды орнотуу иштери 95 пайыз аяктап, кошумча электр линиясын тартуу иштери жүрүп жатат.
