Бишкек, 27.01.25. /Кабар/. Министрлер кабинетинин төрагасы Адылбек Касымалиев Бишкек шаарынын мэриясынын жыйынтыктоочу коллегиясынын алкагында борбор калаанын муниципалдык кызматтарынын муктаждыктары үчүн сатып алынган жаңы атайын техникалар менен таанышты.
Таанышуунун жүрүшүндө борбор калаанын мэри Айбек Жунушалиев минкаб төрагасына муниципалдык автопаркты модернизациялоо программасын ишке ашыруунун алкагында, муниципалдык ишканалар үчүн 238 даана заманбап атайын техника сатып алуу үчүн Бишкек шаарынын мэриясы тарабынан 2024-жылы шаардык бюджеттен 1 млрд сом бөлүнгөнүн маалымдады. Сатып алынган атайын техникаларга – таштандыларды ташуучу унаалар, шыпыруучу жана сугаруу машиналары, бак-дарактарды бутоо жана жашылдандыруу үчүн машиналар, көчөлөрдү жарыктандырууда колдонулуучу машиналар, жол инфраструктурасын тейлөө үчүн техникалар, бульдозерлор, самосвалдар, ошондой эле авариялык жана суу ташуучу унаалар кирет.
Мындан тышкары, түркиялык Isuzu өндүрүүчүсүнүн экологиялык жактан таза суюлтулган газ менен жүргөн жаңы заманбап автобустары көрсөтүлдү.
Минкаб төрагасы муниципалдык инфраструктураны жана коомдук транспортту модернизациялоо борбор калаа үчүн артыкчылыктуу багыт болушу керектигин белгилеп, борбор калаанын калкын сапаттуу тейлөө үчүн бул багыттагы иштерди улантуу зарылдыгын кошумчалады.
