Бишкек, 02.06.26. /Кабар/. Министрлер кабинетинин төрагасы Адылбек Касымалиев эки күндүк иш сапары менен Баткен облусуна барып, алгач Лейлек районундагы бир катар объектилерге баш бакты.
Алсак, минкаб башчысы Лейлек районунун Жалпы дарыгердик практика борборунун абалы менен таанышып чыкты. Маалым болгондой, 2025-жылы Терапия бөлүмү авариялык абалга келгендиги үчүн жабылып, негизги имараттын экинчи кабатына көчүрүлгөн. Ошондуктан дарыгерлер Неврология жана терапия бөлүмү үчүн өзүнчө жаңы имарат куруу зарылчылыгын айтышты. Минкаб башчысы аталган маселени чечүү боюнча тийиштүү мамлекеттик органдарга сунуштарды иштеп чыгуу тапшырмасын берди.
Андан соң Кулунду айыл аймагынын Булак-Башы айылындагы "Мега Газоблок КейЖи" ишканасынын ишмердүүлүгү менен таанышты. Немец технологиясы менен автоклав газоблокторун чыгаруучу бул завод экологиялык таза курулуш материалын өндүрүүдө. Завод күнүнө 1200 куб метрге чейин сапаттуу автоклавдык газоблок чыгара алат.
Ошондой эле минкаб төрагасы Лейлек районунун Кулунду айыл аймагындагы Раззаков жана Максат айылдарынын курулушу менен да таанышып чыкты. Турукташтыруу фондунан Лейлек районунун Раззаков айылындагы жаңы конушту ичүүчү таза суу менен камсыздоо жана канализация системасын монтаждоо үчүн 39 миллион сом, ал эми Максат айылына 15 миллион сом акча каражаты бөлүнүп, учурда ичүүчү таза суу жана канализация системасы пайдаланууга берилди.
Мындан тышкары, Раззаков айылында 2,4 чакырым жолго асфальт төшөө иштери толук аяктап, бүгүнкү күндө кошумча лоток жана бордюрлар коюлууда. Ал эми Максат айылында 1 чакырым 120 метр жолго асфальт төшөө үчүн негизги иштери бүткөрүлдү.
Ошондой эле минкаб башчысы жергиликтүү тургундар менен жолугуп, алардын суроолоруна жооп берди. Жыйынтыгында минкаб төрагасы аталган айылдарга көчүп келген жарандар үчүн бардык шарттарды түзүү зарылчылыгын белгилеп, социалдык объектилерди өз убагында сапаттуу бүткөрүүнү тапшырды.
