Бишкек, 29.07.26 /Кабар/. Нарын облусунун Ат-Башы районундагы Ача-Кайыңды – Калинин унаа жолунун 7-13-чакырым аралыгында жалпысынан 6 чакырым жолго асфальт басуу жумуштары аяктады. Бул тууралуу Транспорт министрлиги билдирет.
Ошондой эле аталган райондогу Чар – Ак-Муз унаа жолунда жалпы 7,8 чакырым жолго асфальт төшөө пландалган. Бүгүнкү күнгө карата анын 5,1 чакырымына асфальт төшөлдү. Мындан сырткары, Таш-Рабат унаа жолунун 5 чакырымын асфальттоо каралган. Учурда жер жумуштары аяктап, асфальт басууга даярдык жүрүп жатат.
Аткарылган иштер жол кыймылынын коопсуздугун камсыздап, транспорттук каттамдардын сапатын жакшыртуу максатында техникалык талаптарга ылайык жүргүзүлүүдө.
