Бишкек, 27.07.26. /Кабар/. Шанхай кызматташтык уюму (ШКУ) өлкөлөрү жасалма интеллект, илим жана билим берүү багыттарында биргелешкен мейкиндик түзүүгө басым жасашы керек. Бул тууралуу Кыргызстандын Эл аралык жогорку медицина мектебинин экономика жана өнүктүрүү боюнча проректору Төлөнбек Абдыров ШКУнун ЖМК жана аналитикалык борборлор форумунда билдирди.
Анын айтымында, бүгүнкү күндө дүйнөдө өнүгүүнүн негизги булагы катары билим, инновация жана технологиялардын ролу жогорулоодо. Ал эми жасалма интеллект дүйнөнү тез өзгөртүп жаткан технологиялардын бири болуп калды.
“Эгерде байыркы Жибек жолу мамлекеттерди соода жолдору аркылуу байланыштырса, азыркы санариптик Жибек жолу университеттерди, илимий борборлорду, инновациялык компанияларды, окумуштууларды жана жаштарды бириктирет”, — деди Абдыров.
Ал жасалма интеллект бүгүнкү күндө жөн гана технологиялык жаңылык эмес, дүйнөлүк экономиканын негизги өнүгүү факторлорунун бирине айланып жатканын белгиледи. Анын таасири билим берүү, медицина, транспорт, өнөр жай, каржы жана мамлекеттик башкаруу тармактарында күч алууда.
Абдыров ШКУ өлкөлөрү чоң интеллектуалдык потенциалга ээ экенин айтып, эми бул мүмкүнчүлүктөрдү бириктирүү зарылдыгын белгиледи.
“Биз транспорттук коридорлорду куруп, соода жана инфраструктураны өнүктүрүп жатабыз. Эми билим, илимий идеялар, билим берүү программалары жана инновациялык чечимдер эркин алмашкан интеллектуалдык коридорлорду түзүүгө убакыт келди”, — деди ал.
Ал ШКУ алкагында бир катар демилгелерди сунуштады. Алардын арасында:
- жасалма интеллект боюнча университеттик борборлордун тармагын түзүү;
- бирдиктүү санариптик билим берүү платформасын иштеп чыгуу;
- студенттердин, окумуштуулардын жана изилдөөчүлөрдүн академиялык мобилдүүлүгүн кеңейтүү;
- ШКУ өлкөлөрүнүн жаш изилдөөчүлөрү жана жасалма интеллект иштеп чыгуучулары үчүн жыл сайын форум өткөрүү бар.
Ошондой эле ал жасалма интеллектти өнүктүрүүдө адам кызыкчылыгы биринчи орунда турушу керектигин белгиледи. Анын пикиринде, жаңы технологиялар маданий көп түрдүүлүктү урматтоого, жеке маалыматтарды коргоого жана бардык өлкөлөр үчүн жеткиликтүү болууга тийиш.
Төлөнбек Абдыров жасалма интеллект маданий мурасты сактоодо да маанилүү экендигин кошумчалады.
