Бишкек 17.07.25 /Кабар/. Дүйнөдөгү эң кары марафончу Фауджа Сингх автоунаа сүзүп кетип каза болду. Бул тууралуу Евроньюс агенттиги жазды.
Маалыматта белгиленгендей, марафончуну өзү төрөлүп-өскөн Джаландхар шаарынан жолдон өтүп баратканда унаа сүзүп кеткен.
Сингх жубайы менен уулу каза болгондон кийин 89 жашында чуркоону баштаган. 2011-жылы 100 жашында Торонто шаарындагы марафондо финишке жетип, дүйнөдөгү эң кары марафончу аталган. Бирок туулгандыгы тууралуу күбөлүгү жок болгондуктан, расмий түрдө Гиннес рекорддор китеби аны тааныган эмес.
Ал Лондон олимпиадасында (2012) факел көтөрүп чыккан, 2000-жылдан бери тогуз марафонго катышкан. Өзүнүн акыркы жарышын 101 жашында, 2013-жылы Гонконг марафонунда 10 чакырым аралыкта жыйынтыктаган.
