Бишкек, 24.04.26. /Кабар/. Бүгүн борбор калаадагы №93 кесиптик лицейде “Кесиптер дүйнөсүндөгү жасалма интеллект” аттуу маанилүү иш-чара өттү.
Анын алкагында жаштарды туура кесип тандоого багыттоо, заман талабына жараша адистиктердин маңызын түшүндүрүү жана жасалма интеллект доорунда эмгек рыногунда кайсы кесиптер зарыл болору тууралуу кызуу талкуулар уюштурулду.
Технологиялар күн сайын өнүгүп, билим берүү системасы жаңыланып жаткан шартта, Бишкек шаарындагы бул окуу жай өз багытын жоготпой, заманбап нукта өзгөрүүгө умтулуп келе жаткан алдыңкы мекемелердин бири болуп саналат.
1974-жылдан бери иштеп келе жаткан бул окуу жай жарым кылым ичинде 25 миңден ашуун адисти даярдап чыгарды. Бул жөн гана статистика эмес, миңдеген адамдардын тагдырына таасир этип, өлкө экономикасына кошулган зор салым. Мурда радиоэлектроника тармагында адистерди даярдап келген лицей, эгемендүүлүк жылдарынан тарта багытын заманга шайкеш өзгөртүп, бүгүнкү күндө маалымат технологияларынын жана техникалык прогресстин борборуна айланды. Учурда бул жерде веб-иштеп чыгуучулар, маалымат базасы боюнча адистер жана компьютердик графика дизайнерлери сыяктуу эң суроо-талапка ээ кесип ээлери тарбияланууда.
Лицейдин директору Анара Серекованын айтымында, окуу жай жөн гана билим берүүчү мекеме эмес, келечектин адистерин даярдаган заманбап борбор болуп саналат.
“Биздин лицей Азия өнүктүрүү банкы, Дүйнөлүк банк сыяктуу эл аралык жана жергиликтүү уюмдар менен тыгыз кызматташат. Бул өнөктөштүк билим берүүнүн сапатын жогорулатууга, заманбап лабораторияларды жана санариптик жабдыктарды киргизүүгө чоң өбөлгө түзүүдө. Бүгүнкү иш-чарада да жасалма интеллекттин кесиптерге тийгизген таасири тууралуу сөз кылып, студенттердин чыгармачылык иштерин сунуштадык. Биздин негизги максатыбыз өз кесибин мыкты билген, жоопкерчиликтүү жана коомдо өз ордун таба алган жарандарды тарбиялоо”, - деп белгиледи.
Бүгүнкү күндө лицей бир нече актуалдуу багыттарда адистерди даярдайт. Санариптик тармакта программалык камсыздоо жана тармак администраторлору окутулса, техникалык багытта компьютердик жана тиричилик техникаларын, уюлдук телефондорду, ал тургай кондиционер жана муздаткычтарды оңдоо боюнча адистер даярдалат.
Ошондой эле көркөм жана тейлөө тармагында дизайнерлер менен катар ашпозчулук кесиби да жогорку деңгээлде үйрөтүлүп келет. Мындай көп тармактуу даярдык бүгүнкү эмгек рыногунун катаал талаптарына жооп берген маанилүү кадам.
Бул өткөрүлгөн иш-чара жөн гана кезектеги жолугушуу эмес, жаштар үчүн жаңыча ой жүгүртүүгө жол ачкан келечектин диалогу болду. Катышуучулар лицей даярдап жаткан кесиптер тууралуу кеңири маалымат алып, студенттердин фантазиясынан жаралган чыгармачылык иштерге, мастер-класстарга күбө болушту.
Күн тартибиндеги негизги чакырык — жаштарды жөн гана диплом үчүн эмес, реалдуу көндүмгө жана кесипке ээ болууга үндөө. Инженердик-педагогикалык курам бүтүрүүчүлөр менен жумуш берүүчүлөрдүн ортосунда түз байланыш түзүп, иш-чара “№93 кесиптик лицейинин жаш таланттары” аттуу концерттик программа менен жыйынтыкталды.
