Бишкек, 11.08.25. /Кабар/. Президент Садыр Жапаров «КР Жарандык процесстик кодексине өзгөртүү киргизүү жөнүндө» мыйзамга кол койду.
Мыйзам 2025-жылдын 18-июнунда Жогорку Кеңеш тарабынан кабыл алынган.
Мыйзамдын максаты аксакалдар сотторунун чечимдерине даттануу маселеси боюнча Кыргыз Республикасынын жарандык процесстик мыйзамдарындагы боштуктарды жоюу болуп саналат.
Алсак, мыйзам менен КР Жарандык процесстик кодексин “Аксакалдар сотторунун чечимдерине даттануу” деген 362-глава менен толукталган. Главада аксакалдар сотторунун чечимдерине даттануунун тартибин, иштердин сотко караштуулугун, даттануунун формасын жана мазмунун, даттанууну кабыл алууну, даттанууну кайтарып берүүнү, даттанууну кароосуз калтырууну, даттанууну кароо тартибин жана соттун ыйгарым укуктарын камтыган ченемдер каралган.
