Бишкек, 17.03.25. /Кабар/. Өзгөн районунун Кызыл-Кырман айылында 275 орундуу мектептин курулушу башталды. Бул тууралуу президенттин Ош облусундагы өкүлчүлүгүнөн билдиришти.
Жумушчу сапары менен Ош облусуна барган Жогорку Кеңештин төрагасы Нурланбек Тургунбек уулу аталган мектептин курулушуна мезгил кутусун салуу аземине катышты.
Билим уясы эки кабаттуу болуп, спорт залы менен кошо заман талабына ылайык бардык шарты менен курулат. Ал үчүн республикалык бюджеттен 233 млн сомдон ашуун каражат каралган.
Белгилей кетсек, Кызыл-Кырман айылындагы И. Базаркулов атындагы орто мектептин эски имараты 1977-жылы ишке берилген. Бүгүнкү күндө эскилиги жеткен мектепте 650дөн ашуун окуучу билим алат.
