Ташкент, 07.03.25. /Кабар/. Өзбекстан менен Грузиянын ортосундагы сооданын көлөмү жакынкы жылдары 1 миллиард долларга жетип, дээрлик үч эсе көбөйөт. Бул тууралуу Өзбекстандын премьер-министринин басма сөз катчысы билдирди.
Ташкентте Өзбекстан менен Грузиянын премьер-министрлери Абдулла Арипов менен Ираклий Кобахидзе баштаган эки өлкөнүн өкмөттүк делегациялары эки тараптуу кызматташуу маселелерин талкуулашты.
«Жолугушууда сооданын көлөмү жана түзүмү биздин өлкөлөрдүн потенциалына дал келбей турганы жана Өзбекстан менен Грузиянын ортосундагы эркин соода келишиминин мүмкүнчүлүктөрүн толук пайдалануу жана жакынкы жылдарда товар жүгүртүүнүн көлөмүн 1 миллиард долларга жеткирүү үчүн бардык зарыл шарттар бар экендиги белгиленди», — деп айтылат маалыматта.
Мындай натыйжага текстиль, электр жабдуулары, тамак-аш продуктылары, түстүү жана кара металлдар, жашылча-жемиш, химия продуктылары, курулуш материалдары менен сооданы өркүндөтүү менен жетишүүгө боло тургандыгы белгиленди.
Тараптардын айтымында, аймактар аралык кызматташтык өзара мамилелерди чыңдоодо чоң мааниге ээ. Айрыкча Самарканд менен Батуми, Бухара жана Мцхетанын ортосунда түздөн-түз кызматташтыктын жолго коюлушу эки тараптуу соода-экономикалык мамилелерди өнүктүрүүгө зор салым кошот.
Өзбекстандын президентинин Грузиянын премьер-министри Ираклий Кобахидзе баштаган делегация менен жолугушуусунда өзбек-грузин кызматташуусун мындан ары кеңейтүүнүн мүмкүнчүлүктөрү да белгиленгендиги айтылат.
