Бишкек, 01.04.25. /Кабар/. Балыкчы шаарынын Ак-Өлөң айылындагы С.Каралаев атындагы №11 орто мектебинин окуучулары өз колдору менен жасаган уяларын канаттуулар үчүн бак-дарактарга илишти. Бул тууралуу NABU Кыргызстан уюмунан билдиришти.
Мындай экологиялык иш-чара жогоруда аталган уюм, Ысык-Көл биосфералык аймагынын дирекциясы жана Ысык-Көл мамлекеттик жаратылыш коругунун өкүлдөрү менен биргелешип уюштурган иш-чаранын алкагында жана 1-апрель – Канаттууларды коргоонун эл аралык күнүнө карата өткөрүлдү.
Иш-чаранын жүрүшүндө окуучуларга канаттуулардын түрлөрү, алардын мааниси жана коргоо жолдору тууралуу маалымат берген атайын презентация көрсөтүлдү. Кызыктуу маалыматтар менен коштолгон сабактан кийин, окуучулар көл жээгинде талаа практикасына чыгышты. Алар подзордук труба жана дүрбүнүн жардамы менен канаттууларды байкап, аларды жакындан изилдөө мүмкүнчүлүгүнө ээ болушту.
Эске сала кетсек, 1-апрель – дүйнө жүзүндө Канаттууларды коргоонун эл аралык күнү катары белгиленет. Бул майрам алгач 1894-жылы АКШда пайда болуп, кийинчерээк башка өлкөлөргө да жайылган. 1906-жылдын 1-апрелинде ЮНЕСКОнун «Адам жана биосфера» программасынын алкагында Канаттууларды коргоо боюнча атайын конвенцияга кол коюлуп, ошондон бери бул дата канаттууларды коргоого арналган күн катары белгиленип келет.
Кыргызстанда канаттуулардын 400гө жакын түрү катталган. Бул түрлөрдүн ичинен 57си өлкөнүн Кызыл китебине киргизилген.
