Бишкек, 18.02.25./Кабар/. Кыргызстанда мөөнөтүнөн мурда шайлоо өтпөй турганын жаңы шайлоо системасы боюнча мыйзам долбоорун иштеп чыккандардын бири ЖКнын вице-спикери Нурбек Сыдыгалиев билдирди.
Анын айтымында, парламенттик шайлоо 2026-жылы ноябрда өз убагында өтөт.
"Журналисттердин бардыгы күзүндө мөөнөтүнөн мурда шайлоо болобу деп сурап жатат. Андай болбойт. Шайлоо өз убагында эле 2026-жылы ноябрда өтөт. Депутаттардыкы да, президенттик шайлоо да өз убагында болот. Бул мыйзам долбоорунун ага эч тиешеси жок", — деди Сыдыгалиев.
Эске салсак, Жогорку Кеңештин VII чакырылышынын депуттарын шайлоо 2021-жылы 28-ноябрда өткөн. Келерки шайлоо 2026-жылы күзүндө өтүшү керек.
