Кытай, Ганьнань. 13.07.26. /Кабар/. Кытайдын Ганьсу провинциясынын түштүгүндө тоолуу аймак катары таанылган Ганьнань-Тибет автономдуу округу жайгашкан.
Аталган аймак өзгөчөлөнгөн маданияты жана экотуризми менен туристтерди өзүнө тартат.
Бул жолу дал ушул аймакка дүйнөнүн 20дан ашык өлкөсүнөн, анын ичинде Франция, Австралия, Канада, Испания, Мексика, Кыргызстан, Казакстан, Өзбекстан жана Тажикстандан келген журналисттер, медиа өкүлдөрү жана сүрөтчүлөр чогулушту.
Аталган эл аралык пресс-турга Кыргыз улуттук “Кабар” маалымат агенттигинин журналисти дагы катышууда.
Пресс-тур 12-июлдан 17-июлга чейин "Ыйык Ганьнань: жан дүйнө саякаты" аттуу экинчи глобалдык медиа-кампаниянын алкагында уюштурулду.
Иш-чаранын алгачкы күнүндө медиа өкүлдөрүнө Ганьнань-Тибет округунун туристтик мүмкүнчүлүктөрү тууралуу кеңири маалымат берилди.
Иш-чара округдун жетекчилеринин презентациялары, округ тууралуу проморолик жана концерт менен коштолду.
Аталган округ жайгашкан Ганьсу провинциясы Кытайдын түндүк-батышында орун алган жана дал ушул аймак аркылуу атактуу Улуу Жибек жолу өткөн.
Бүткүл регионду бойлой узундугу 1000 чакырымга жакын созулган кууш тилке - Ганьсу же Хэси коридору катары белгилүү. Бул коридор өтө маанилүү көпүрө болгон жана Кытайдын борбордук аймактарын Борбор Азия жана Европа менен байланыштырган.
Ал эми Ганьнань тууралуу сөз кыла турган болсок, бул аймак кылымдар бою тибет, хань, хуэй, монгол жана башка этностордун өз ара жуурулушуусу калыптанган мекен катары өзгөчөлөнөт.
Тибет буддизми, көчмөн маданияты жана кытай цивилизациясынын салттары тоолуу аймакта айкалышып, өзгөчө тарыхый-маданий жүз пайда болгон. Бүгүнкү күндө бул мурас байыркы ибадатканалардан, эски кербен жолдорунун изинен, улуттук архитектурадан жана жергиликтүү калктын каада-салтынан даана көрүнүп турат.
Ганьнань-Тибет округундагы тоолор менен дарыялар, көз жоосун алган кең жайыттар жана жашыл токойлор, ошондой эле көчмөндөр жашоосу ички туристтердин жана чет өлкөлүк эс алуучулардын жылдан-жылга агылышына өбөлгө болууда.
Бул аймакка келген эс алуучулардын кызыгуусун жараткан дагы бир жай бул Лабран монастыры.
Ал аталган округдун Сяхэ уездинде жайгашкан жана 1710-жылы негизделген. Лабран тибет буддизминин Гелугпа мектебинин (Сары мектеп) алты эң ири монастырынын бири.
Ал улуттук туристтик аймак, улуттук маанидеги маданий мурас объектиси жана "Дүйнөлүк Тибет университети", ошондой эле Амдо аймагынын маданий жана диний борбору катары таанылган.
Монастырдын эң таанымал символу - аны курчап турган 3,5 чакырым узундуктагы сыйынуучу добулбастар галереясы. 2000ден ашык алтын жалатылган добулбастар орнотулган. Жергиликтүү тургундар күн сайын анын айланасында саат жебеси боюнча басып, дуба кылышат.
Монастырда тибеттик кол жазмалардын, тханкалардын, Будданын айкелдеринин жана ритуалдык буюмдардын кеңири коллекциялары сакталып турат, бул Лабранды тибет маданиятынын баа жеткис кенчине айлантат.
Кытай жана тибет архитектурасын чагылдырган тибет стилиндеги имараттардын комплекси тоонун боорунан ылдый карай жайгашкан.
“Кабар” агенттиги бул жайларды өз окурмандарына сүрөттөр аркылуу баяндап берет.
Өз кезегинде журналисттердин Кытайдагы пресс-туру уланып жатат.
