Бишкек, 22.09.26. /Кабар/. Министрлер кабинетинин төрагасы – Кыргыз футбол биримдигинин президенти Адылбек Касымалиев Борбор Азия футбол ассоциациясынын (CAFA) U-17 кыздар арасындагы чемпионатында чемпион болгон Кыргызстандын U-17 кыздар курама командасы менен жолугушту.
Кыргызстандын кыздар курамасы Ташкентте өткөн мелдеште Иран жана Тажикстан курамаларын жеңип, Өзбекстан менен тең чыгып, турнирдин жеңүүчүсү болушту. Бул – аталган мелдештердеги Кыргызстандын алгачкы алтын медалы.
Жолугушууда министрлер кабинетинин төрагасы жаш футболчуларды жана машыктыруучулар штабын тарыхый ийгилиги менен куттуктап, КР президентинин жана министрлер кабинетинин атынан белектерди жана сыйлыктарды тапшырды.
