Бишкек, 10.03.25. /Кабар/. Бүгүн тышкы иштер министри Жээнбек Кулубаев Түркиянын элчиси Ахмет Садык Доганды дипломатиялык миссиясынын аяктагандыгына байланыштуу кабыл алды. Бул тууралуу ведомстводон билдиришти.
Жолугушууда министр Жээнбек Кулубаев кыргыз-түрк боордоштук мамилелерин өнүктүрүү Кыргызстандын тышкы саясатынын артыкчылыктуу багыты экенин баса белгиледи. Буга байланыштуу Түркия президенти Режеп Тайип Эрдогандын 2024-жылы Кыргызстанга болгон мамлекеттик сапарынын маанилүүлүгүн, анын жыйынтыгында өлкөлөр ортосундагы кызматташтыктын деңгээли Кеңири стратегиялык өнөктөштүккө көтөрүлгөнүн баса белгиледи.
Жолугушуунун соңунда министр Жээнбек Кулубаев Кыргызстандагы жемиштүү иши жана кыргыз-түрк стратегиялык мамилелеринин өнүгүшүнө кошкон зор салымы үчүн элчиге ыраазычылык билдирип, Ахмет Садык Доган тууралуу кыргыз элинде жакын дос катары жылуу эскерүүлөр каларын белгиледи.
