Бишкек, 07.10.25. /Кабар/. Транспорт каражаттарын жана айдоочулук курамды каттоо боюнча мамлекеттик борбордун директорлугуна Тынычбек Саидов, директордун орун басарлары болуп Тилек Женишев жана Толубай Жакишев дайындалды. Бул тууралуу президенттин Иш башкармалыгынан билдиришти.
Маалымдалгандай, бүгүн президенттин Иш башкармалыгынын башчысы Каныбек Туманбаев аталган борбордун иши менен таанышуу учурунда жамаатка жаңы дайындалган жетекчиликти тааныштырды.
Белгилей кетсек, буга чейин аталган орган министрлер кабинетинин алдында агенттик макамында иштеп келген. Жакында Иш башкармалыктын балансына өттү.
Каныбек Туманбаев борбордун жетекчилигине жана кызматкерлерине бир катар маанилүү тапшырмаларды койду. Алардын ичинде бардык процесстерди санариптештирүү жана документтерди толук электрондоштуруу, адам факторун жоюу, коррупциялык тобокелчиликтерди алдын алуу, ошондой эле коопсуздук деңгээлин жогорулатуу милдеттери белгиленди.
Мындан тышкары, имараттарды модернизациялоо, материалдык-техникалык базаны чыңдоо жана окуу бөлүгүн реформалоо маселелерине өзгөчө көңүл бурулду.
Президенттин Иш башкармалыгынын бащшчысы борбордун эффективдүү иштеши үчүн кызматкерлердин эмгек акысын көтөрүү, шарттарды түзүү зарыл экенин айтып, бул кадам коррупциялык тобокелчиликтерди жоюуга өбөлгө түзөрүн кошумчалады.
