Бишкек, 05.06.26. /Кабар/. Күн мурун, 4-июнда саат 22:20 чамасында жааган жаандын кесепетинен Сузак районунун Төш айылында сел жүрдү.
Өзгөчө кырдаалдар министрлигинин Жалал-Абад облустук башкармалыгынан билдиришкендей, кокту-колоттордон келген сел суулары айылдагы 20 турак үйдүн короосун каптаган. Анын ичинен эки турак үйдүн кампасына жана төрт турак үйдүн сарайына суу кирген.
"Бүгүн, 5-июнда селдин кесепеттерин жоюу иштерине 21 куткаруучу, 3 мотопомпа, жарандык коргонуу кызматтарынан 42 кызматкер жана жергиликтүү тургундар тартылды", - деп айтылат маалыматта.
Белгиленгендей, учурда тазалоо жана калыбына келтирүү иштери кызуу уланууда.
