Бишкек, 05.08.25. /Кабар/. Сокулукта социалдык кызматкерлерге жаңы имарат курулушу мүмкүн. Бул тууралуу эмгек, социалдык камсыздоо жана миграция министри Равшанбек Сабиров Сокулук райондук эмгек, социалдык камсыздоо жана миграция башкармалыгына барган учурда белгилүү болду.
Ведомствонун маалыматына караганда, министрди Жогорку Кеңештин депутаты Винера Раимбачаева жана район акими Илияз Ташкулов коштоп жүрдү.
Анда министр учурда мурдагы заводдун имаратында ижарага алынган жана өзүнүн административдик имараты жок башкармалыктын кызматкерлеринин учурдагы иштөө шарттары менен таанышты. Курулуш үчүн жер тилкеси бар болгонуна карабай бул долбоорду ишке ашыруу үчүн мекеме каржылык колдоого муктаж.
Сабиров өлкөнүн экономикасы өнүгүп жаткан шартта жаңы имарат куруу маселеси чечүүгө мүмкүн экенин белгилеп, каржылоонун мүмкүн болгон булактарын карап чыгуу боюнча сунуштарды даярдоону тапшырды.
