Бишкек, 21.05.25. /Кабар/. Бүгүн саламаттык сактоо министри Эркин Чечейбаев Сузак районунда жайгашкан А. Ташиева атындагы Эне жана баланы коргоо борборуна барып, анын ишмердүүлүгү менен таанышты. Бул тууралуу ведомстводон маалымдашты.
Борбордун директору Саида Маткеримованын айтымында, мекеме 16-майда ишке киргенден бери 51 төрөт кабыл алынган, анын ичинде бир эгиз төрөт катталган. Ошондой эле жакында борборго кош бойлуулук учурунда оор татаалдашуулар — преэклампсия диагнозу коюлган бейтап жеткирилген. Медициналык кызматкерлердин кесипкөйлүгүнүн аркасында төрөт ийгиликтүү аяктаган.
Учурда борборго Бишкектен келген адистер жардам көрсөтүп жатышат. Министр алардын иштөө жана жашоо шарттары тууралуу маалымат алды.
Эркин Чечейбаев мекеме жетекчилиги менен учурдагы маселелерди талкуулап, зарыл дары-дармектерди мамлекеттик "Кыргызфармация" ишканасы аркылуу түз жеткирүү маселесин ыкчам чечти.
Министр борбордун материалдык-техникалык базасын чыңдоонун, медицина кызматкерлеринин квалификациясын жогорулатуунун жана калкка сапаттуу медициналык жардамдын жеткиликтүүлүгүн камсыздоонун маанилүүлүгүн баса белгиледи. Анын айтымында, мындай мекемелер эне жана ымыркай өлүмүн азайтууда, ошондой эле калктын ден соолугун чыңдоодо маанилүү роль ойношот.
