Бишкек, 26.02.25. /Кабар/. Президент Садыр Жапаров бүгүн, 26-февралда, Кыргызстанда иш сапары менен жүргөн Түркмөнстандын министрлер кабинетинин төрагасынын орун басары, тышкы иштер министри Рашид Мередов менен жолугушту.
Тараптар эки тараптуу кызматташуунун актуалдуу маселелерин, анын ичинде соода-экономикалык жана маданий-гуманитардык байланыштарды, ошондой эле энергетика жана транспорттук логистика тармагындагы өз ара аракеттенүүнү талкуулашты.
Мамлекет башчысы Кыргызстандын эки тараптуу кызматташтыкты мындан ары да чыңдоого умтулгандыгын баса белгилеп, Түркмөнстандан Кыргызстанга энергия булактарын жеткирүү боюнча маселелерди чечкендиги үчүн түркмөн тарапка ыраазычылыгын билдирди.
Президент өлкөлөр ортосундагы транспорттук-логистикалык кызматташтыктын олуттуу потенциалын белгилеп, өлкөлөр ортосундагы соода-экономикалык мамилелердеги оң динамикага басым жасады.
Садыр Жапаров чакырыктарга жана коркунучтарга биргелешип каршы туруу үчүн көп тараптуу платформалардын алкагында өз ара аракеттенүүгө даяр экендигин билдирди.
Өз кезегинде Түркмөнстандын министрлер кабинетинин төрагасынын орун басары, тышкы иштер министри Рашид Мередов мамлекет башчысына жылуу кабыл алгандыгы үчүн ыраазычылык билдирди. Министр президент Садыр Жапаровдун 2021-жылы Түркмөнстанга болгон биринчи мамлекеттик сапары Кыргызстан менен Түркмөнстандын ортосундагы саясий, соода-экономикалык, маданий-гуманитардык жана башка тармактарда өнөктөштүк өз ара аракеттенүүнүн потенциалын мындан ары жогорулатууга байланыштуу стратегиялык маанилүү маселелерди талкуулоого мүмкүн болгон кеңири багыттар боюнча Кыргыз-түркмөн кызматташтыгын илгерилетүү процессиндеги маанилүү этап болгонун белгилеп өттү.
Рашид Мередов Түркмөнстандын кызматташтыкты мындан ары тереңдетүүгө даярдыгын баса белгилеп, биргелешкен аракеттер эки мамлекеттин ортосундагы боордоштук жана ынак коңшулук мамилелерди чыңдоого өбөлгө болоорун айтты.
Жолугушуунун аягында президент Садыр Жапаров кыргыз-түркмөн мамилелери мындан ары да стратегиялык өнөктөштүктүн бекем пайдубалында өнүгө берерине ишеним билдирди.
