Бишкек, 06.11.26. /Кабар/. Президент Садыр Жапаров бүгүн, 6-ноябрда Чүй облусуна болгон иш сапарынын алкагында Сокулук районунун тургундары менен жолукту.
Ачык диалогдун жүрүшүндө жарандар Мамлекет башчысына коомдук турмуштун ар кандай тармактарына тийиштүү маселелер боюнча кайрылып, ошондой эле мамлекеттик деңгээлде чечүүнү талап кылган көйгөйлөрдү белгилешти.
Жолугушуунун жүрүшүндө жеке мүнөздөгү маселелер да, райондун социалдык-экономикалык өнүгүүсүнүн актуалдуу темалары да, анын ичинде социалдык инфраструктураны өнүктүрүү, билим берүү жана спорт объектилерин куруу жана оңдоо, мамлекеттик ипотекалык программанын алкагында турак жай менен камсыздоо, ошондой эле жер жана мүлк талаштары козголду.
Мындан тышкары, тургундар мунапыс, кылмыш иштерин кароо жана укук коргоо органдарынын ишмердүүлүгү боюнча кайрылышты.
Президент Садыр Жапаров ар бир кайрылууну кылдат жана ар тараптуу кароо зарылдыгын баса белгилеп, тармактык министрликтерге жана ведомстволорго тиешелүү тапшырмаларды берди.
