Бишкек, 16.04.25. /Кабар/. Президент Садыр Жапаров бүгүн, 16-апрелде, Түркия Республикасынын «Ихлас Холдинг» акционердик коомунун директорлор кеңешинин төрагасы Ахмет Мужаид Оренди кабыл алды.
Жолугушууда түрк инвестициялык компаниялардын катышуусунда энергетика тармагында биргелешкен долбоорлорду ишке ашыруу маселелери талкууланып, жашыл энергетиканы өнүктүрүүгө, ири ГЭСтерди курууга жана өлкөлөр ортосундагы ишкер байланыштарды чыңдоого өзгөчө көңүл бурулду.
Мамлекет башчы бүгүнкү күндө Кыргызстанда жашыл энергетика объектилерин өнүктүрүүгө кызыкдар инвесторлорго ыңгайлуу жана жагымдуу шарттар түзүлгөнүн баса белгиледи.
Буга чейин Түркиянын президенти Режеп Тайып Эрдогандын өткөн жылдын 5-декабрында мамлекеттик сапарынын жыйынтыгында Кыргызстандын Энергетика министрлиги менен «Орто Азия инвестициялык холдинги» ААКнын ортосунда ГЭСтерди куруу жана эксплуатациялоо долбоорун ишке ашыруу боюнча алкактык макулдашууга кол коюлган.
Ошентип, «Ихлас Холдинг» ААКсы Кыргызстанда долбоорлорду ишке ашыруу максатында «Орто Азия инвестициялык холдинги» ААКсын түздү.
Садыр Жапаров ошондой эле «Орто Азия инвестициялык холдинги» ААК «Кыргыз гидродолбоор» институту менен биргеликте Жалал-Абад облусунун аймагындагы Алабуга ГЭСи, Карабулуң ГЭС-1, Карабулуң ГЭС-2 курулушу болжолдонгон аймактарда изилдөө иштери аяктаганынан кабардар экенин билдирди.
Буга байланыштуу мамлекет башчы бул инновациялык техникалык чечимдерди колдонгон ири инвестициялык долбоорлордун бири экенин белгиледи.
Жолугушууда Бишкек шаарындагы ЖЭБ-2ни куруу долбоорун ишке ашыруу маселеси да талкууланды. Садыр Жапаров 2028-жылы жаңы жылуулук электр борбору ишке киргенден кийин борбор калаанын экологиялык абалынын бир кыйла жакшыруусу күтүлүп жатканын белгиледи.
«Долбоордо заманбап энергоблокторду куруу, жаңы жабдууларды орнотуу, көмөкчү инфраструктураны өнүктүрүү, ошондой эле жылуулук жана электр менен камсыздоо тутумдарын модернизациялоо камтылган. Газ түтүгүнүн долбоору өзгөчө көңүл бурууну талап кылат - аны ишке ашыруу шаар тургундары үчүн мүмкүн болушунча коопсуз болушу керек», - деп белгиледи президент.
Өз кезегинде «Ихлас Холдинг» АКнын директорлор кеңешинин төрагасы Ахмет Мужаид Орен компаниянын белгиленген долбоорлорду ишке ашырууга даяр экендигин ырастады.
«Бүгүн биздин компания Кыргызстанда расмий көрсөтүлдү. Биз гидроэнергетика жана жылуулук энергетика тармагындагы долбоорлорду стратегиялык маанилүү жана артыкчылыктуу деп эсептейбиз. Аларды ишке ашыруу өлкөнүн энергетика тармагын туруктуу өнүктүрүүнүн негизи болуп, кийинки инвестициялык демилгелер үчүн шарттарды түзөөрүнө ишенебиз», - деди Ахмет Мужаид Орен.
Ал белгилегендей, компания өзүн улуттук кызыкчылыкка туура келген ички инвестор катары көрсөтөт. Ошондой эле жасалган бардык кадамдар мамлекет жана Кыргызстандын жарандары үчүн туруктуу жана узак мөөнөттүү баалуулуктарды түзүүгө багытталганын кошумчалады.
Жолугушуунун соңунда президент Садыр Жапаров кадрларды даярдоо, адистердин квалификациясын жогорулатуу жана тажрыйба алмашуу жаатында кызматташууну өнүктүрүүнү сунуштады. Ал мындай өз ара аракеттенүү эки жактуу пайда алып келерин жана биргелешкен долбоорлорду ийгиликтүү ишке ашырууга өбөлгө болорун баса белгиледи.
