Бишкек, 30.05.26. /Кабар/. Президент Садыр Жапаров бүгүн, 30-майда курулуп жаткан “Бишкек Арена”көп функционалдуу спорт комплексине пландан тышкары барып, долбоорду ишке ашыруунун жүрүшү менен таанышты.
Мамлекет башчысына стадиондун курулушу бекитилген графикке ылайык жүрүп жатканы тууралуу маалымат берилди. Бүгүнкү күндө объектте курулуш-монтаждоо жана жасалгалоо иштери улантылууда, инженердик системалар орнотулуп, айлана-тегереги көрктөндүрүлүүдө.
Садыр Жапаров кыдыруу учурунда стадиондун ички бөлмөлөрүн көрүп чыгып, унаа токтотуучу жайдын жана коммерциялык объектилердин курулушунун жүрүшү менен таанышты.
Мамлекет башчысы “Бишкек Аренанын” курулушу өлкөнүн спорттук инфраструктурасын мындан ары өнүктүрүүдө жана эл аралык деңгээлдеги мелдештерди өткөрүү мүмкүнчүлүктөрүн кеңейтүүдө өзгөчө мааниге ээ экенин баса белгиледи.
Президент курулуш иштеринин жогорку сапатын камсыз кылууну жана долбоорду белгиленген мөөнөттө аяктоону тапшырды.
Ошондой эле Садыр Жапаров комплекс пайдаланууга берилгенден кийин анын натыйжалуу иштеши үчүн зарыл болгон инфраструктураны түзүүнүн маанилүүлүгүн белгиледи. Ушуга байланыштуу ал стадиондун аймагынын бир бөлүгүнө соода жана тейлөө объектилерин жайгаштыруунун максатка ылайыктуу экенин айтты. Бул объектилердин ишмердүүлүгү комплексти күтүп алууга жана андан ары өнүктүрүүгө көмөк көрсөтөт.
51 миң көрүүчүгө ылайыкталган "Бишкек Арена" стадиону Кыргызстандагы эң чоң футбол аренасы болуп калат. Объект FIFA жана AFC эл аралык стандарттарына ылайык курулуп жатат, бул өлкөдө ири эл аралык беттештерди жана мелдештерди өткөрүүгө шарт түзөт.
