Бишкек, 16.04.26. /Кабар/. Күн мурун, 15-апрелде Экологиялык жана техникалык көзөмөл кызматынын Ысык-Көл регионалдык башкармалыгынын инспекторлору Ысык-Көлдүн акваториясын тазалашты. Бул тууралуу Жаратылыш ресурстары, экология жана техникалык көзөмөл министрлигинен кабарлашты.
Маалыматка ылайык, рейдде көлдөн узундугу 500 метрге жакын эски синтетикалык балык уулоочу торлор чыгарылды.
"Мындай торлор суудагы биоресурстарга олуттуу коркунуч келтирет. Алар балыктардын жана көлдүн башка жандыктарынын кырылышына алып келет, ошондой эле сууну булгайт", – деп айтылат маалыматта.
Министрлик жарандарды жана туристтерди курчап турган чөйрөгө аяр мамиле жасоого жана жаратылышты коргоо мыйзамдарын сактоого чакырат.
