Бишкек, 05.11.26. /Кабар/. Кыргызстанда өтө турган алдыдагы шайлоого ЕККУнун Демократиялык институттар жана адам укуктары боюнча бюросунун байкоочулар миссиясын жөнөтүү мүмкүнчүлүгү каралууда. Бул тууралуу Борбордук шайлоо комиссиясынан билдиришти.
Маалыматка ылайык, БШКнын өкүлдөрү бюронун шайлоо маселелери боюнча кеңешчилери Ранко Вукчевич жана Каха Инаишвили менен жолугушту.
Жолугушууда шайлоого даярдык, жабдууларды жана шайлоочуларды идентификациялоо системасын тестирлөө, шайлоо комиссияларынын мүчөлөрүн окутуу маселелери талкууланды.
Ошондой эле мүмкүнчүлүгү чектелген жарандар үчүн шайлоо участокторунун жеткиликтүүлүгүн камсыз кылуу жана жаштардын шайлоого катышуусун жогорулатуу боюнча иштер айтылды.
Жолугушуу алдыдагы шайлоого эл аралык байкоочулар миссиясын жөнөтүүнүн зарылдыгын жана мүмкүнчүлүгүн аныктоо максатында өткөрүлдү.
